Dadweynihii Baasaabooradda u doonan jiray Garoowe oo cabsi darteed Muqdisho u wareegay, Diyaaradahana ku raaca nidaam u fududeeya Safarkooda

0
201

Ciidamadda is horfadhiya xuduudka Somaliland iyo Puntland oo kalifay inay dadku Muqdisho diyaaradaha u raacaan.

Hargeysa(Waaheen) Dadweynihii danuhu kaga xidhnaayeen baasaaboor Somaliga ee u doonin jiray Garoowe oo u wareegay dhinac Muqdisho, kadib markii ay ka baqeen inay naftooda ku biimeeyaan xuduudka u dhaxeeya Somaliland iyo Puntland oo ay dhooban yihiin ciidamo heegan ugu jira xaalad dagaal haddii ay timaado.

Wararka Wargeyska Waaheen ka helayo socdaalka dadka baasaaboor doonka ah ayaa la sheegayaa inay hawl fududayn u isticmaalaan waraaqaha dal ku noqoshada loo yaqaan (Go home), kuwaas oo ay ka qaataan madaarka si ay ugu raacaan diyaaradaha.

Ilo wareedyadda Wargeysku ka helayo arrintan oo uu u kuur galay ayaa sheegaya in ay maalin kasta ugu yaraan labaatan qof tiro gaadhaysa ayaa ku dhoofto nidaamkaas si ay usoo helaan baasaaboor Somaliga, kaasoo ay ka soo qaataan magaaladda Muqdisho oo noqotay marinka kaliya ee ay kaga maarmi karaan halista jidka Garoowe.

Isticmaalka baasaaboor Somaliga waxa kalifa iyadoo ay dadweynaha Reer Somaliland kuwooda aan haysan baasaabooradda Ajanabiga ah ay khasab ku noqoto si ay danahooda ugu soo qabsadaan, gaar ahaan arrimaha Caafimaadka, Waxbarashada iyo Ganacsiga oo ay ku xidhaan dalalka aan aqoonsanayn Baasaaboor Somaliland-ka.

Ka hor intii aanu xidhmin ama aanay xaaladda colaadeed dhex marin Somaliland iyo Puntland waxa lagu qiyaasay shan boqol oo qof inay bil walba u doonan jireen Garoowe Baasaaboor Somaliga, iyadoo dadka u doonan jiray ay si fudud oo dhakhso ah uga soo noqon jireen.

Talaabadda ay dadweynuhu Muqdisho ugu doonanayaan baasaaboor Somaliga ayaa fududaysay in dad badan oo aan tagi jirin Muqdisho u safraan isla markaana uga raadsadaan baasaaboorkaasi maadaama aan wali la ictiraafin Somaliland.