Day Archives: October 22, 2017

VideosWararka

Dawladda Jabuuti oo wefti ka socda Rugta Ganacsiga usoo dirtay Somaliland

Weftigu waxay u imanayaan sidii ganacsatada Somaliland Carwo ugu qabsan lahayd Dalka Jabuuti toddobaadka u horeeya Bisha Diisambar

Hargeysa(Waaheen) Wefti balaadhan oo uu hogaaminayo guddoomiyaha Rugta Ganacsiga Dalka Jabuuti  ayaa imanaya maalinta berri magaaladda Hargeysa, halkaas oo ay ku sugnaan doonaan dhawr maalmood.

Weftiga Jabuuti ayaa isla berri tagi doona magaalo xeebeedka Berbera, halkaas oo ay ku soo qaadan doonaan booqasho hal maalin ah, iyagoo ku soo noqon doona Hargeysa, oo ay maalinta salaasadda ah shirk u qaban doonaan.

Weftiga Rugta Ganacsiga Jabuuti ayaa ujeedada safarkooda lagu sheegay inay abaabulayaan Carwo ganacsi oo ay ugu talogaleen ganacsatada Somaliland inay ku qabsadaan dalka Jabuuti, si ay ugu soo bandhigaan Badeecadaha ay ka ganacsadaan.

Qorshahan oo ah kii ugu horeeyey ee dhex mara Somaliland iyo Jabuuti ayaa qayb ka ah xidhiidhka ganacsi ee labada dal sidii loo xoojin lahaa, isla markaana labada Dawladood uga fikiri lahaayeen iskaashi Ganacsi.

Qorshaha Rugta Ganacsiga Jabuuti ayaa ah in Badeecadaha Somaliland loo Iibgayn karo dalkaasi mudada ay Carwada socoto, iyadoo ay ku gali doonaan bilaa Cashuur, isla markaana ay ka faa’iidaystaan fursadaas ganacsi.

Dawladda Jabuuti ayaa ugu baaqaysa Ganacsatada Somaliland inay ka faa’iidaystaan fursadaasi, isla markaana uu qof kasta oo danaynaya Ganacsigiisa in uu Jabuuti geeyaa helo doono soo dhaweyn balaadhan.

VideosWararka

Madaxweynaha Somaliland Oo Shacbiga Burco Kala Qaybgalay Isu-soo Baxa Ololaha Doorashada Madaxtooyada Dardaaran Dhaxal-gal Ahna U Laqimay Kumanaan Taageerayaasha Xisbiga Kulmiye Ka Mid Ah

“waxaan uga mahad-celinayaa, guud ahaan, Shacbi-weynaha Somaliland, yuhuuntii, yidi-diilladii, iskaashigii iyo wada-shaqayntii, ay isla bar-bar taageen Xukuumadda Xisbiga KULMIYE, ee aan Odayga u ahay”. Madaxweyne Silaanyo

 “Anigu, waxaan ummadda u dooray, in hogaamiyihii i bedeli lahaa, uu noqdo Musharaxa Madaxweynaha ee Xisbiga Kulmiye, Muuse Biixi Cabdi, kaas oo ah siyaasi waayo-arag ah, oo ay ku duugan tahay karti, hufnaan iyo aqoon badani”. Madaxweyne Silaanyo                   

Burco(Waaheen) Madaxweynaha Jamhuuriyadda Somaliland Axmed Maxamed Maxamuud Siilaanyo ayaa maanta magaaladda Burco khudbad uga jeediyey taageerayaasha Xisbiga Kulmiye oo fagaaraha Burco ku qabsaday Ololahoodii ugu horeeyey ee Doorashada Madaxtinimadda ee 2017-ka. 

Dhammaan Taageerayaasha faraha badan, ee Xisbiga KULMIYE, ee isugu soo-baxay, Fagaaraha Khayriyada Burco, waxaan idiin soo gudbinayaa salaan Xambaarsan Nabadgelyo iyo Naxariis Eebe “Asalaamu Calaykum Wa Raxmatullaahi Wa Barakaatuhu”.

Mudanayaal iyo Marwooyin,

Farxad weyn bay ii tahay, in aan saaka, dib ugu soo noqdo goobtan, oo ay iigu dambaysay, wakhti aad u dheer. Xasuus dheer, ayey igu leedahay khayriyadan Burco, oo aan Taageerayaasha Xisbiga Kulmiye, wakhtiyo badan, oo kala duwan, kala hadli jiray, aniga oo ah Musharax Madaxweyne. Eebe Mahaddii, maanta waxaan idin hor-joogaa, aniga oo ah Madaxweynihii Qarankan, isla markaana, aan naf-tayda cuud, cod iyo cudud toonna, idiinka rabin.

Xilkan Madaxweyne, ee aan wareejin doono muddo yar ka dib, kuma iman xoog iyo xeelad toona. Hase-yeeshee, waxaan ku haaneeday codkii ay ii hibeeyeen Taageerayaasha Xisbiga KULMIYE, ee Lixda Gobol Doorasho ee Dalka, ku kala sugan. Dhacdadan taariikhiga ahi, waxay saamayn ku leedahay, noloshayda qayb ka mid ah, isla markaana maaha, mid aan abidkay ilaawi karo.

Mudanayaal iyo Marwooyin,

Aniga oo munaasibaddan ka faa’iidaysanaya, waxaan jecelahay, in aan halkan uga mahadceliyo, Taageerayaashii habeen iyo maalin, mudada dheer,  hiilka iyo hooda, ila hareera taagnaa. Mar labaad,  waxaan si weyn ugu mahad-celinayaa dhammaan Wax-garadkii, Aqoon-yahankii, Waayeelkii, Haweenkii iyo Hal-doorkii Dhallinyarada, ee codkoodu suurtagaliyey, in uu KULMIYE guulaysto, isla markaana aan noqdo Madaxweynaha Jamhuuriyadda Somaliland.

Sidoo kale, waxaan uga mahad-celinayaa, guud ahaan, Shacbi-weynaha Somaliland, yuhuuntii, yidi-diilladii, iskaashigii iyo wada-shaqayntii, ay isla bar-bar taageen Xukuumadda Xisbiga KULMIYE, ee aan Odayga u ahay.

Mudanayaal iyo Marwooyin,

Waa hubaal, in Xisbiga KULMIYE, uu ku guulaystay hoggaamintii talada dalka, mudadii uu dalka dawladda ka ahaa. Waxa hubaal ah, in Taageerayaashii noo codeeyey, aanay guul-daraysan, oo aanay is-ciil kaambiyeyn, isla markaana, aanay fartoodii marnaba hiifayn. Waxaan leeyahay, KULMIYE wuu guulaystay, dhammaanteena waynu guulaysannay.

Duco-qabayaal,

Waxa Lib idiinku filan, in aan taladiinii, iyo tacabkiinii midna aan lagu khasaarin. Waxa Lib idiinku filan, in Xukuumaddii Xisbigii aad doorateen, la mahadiyey.

Mudanayaal iyo Marwooyin,

Abaalkii aad, aniga iyo Xisbiga KULMIYE u gasheen, waxaannu ku gud-nay, in aanu dalkii ka hirgelinay horumar balaadhan, iyo is-beddel laxaadle, oo sida cad-ceeda u ifaya. Waxaannu ciwad-celin idiinka dhignay, in aanu fulinay barnaamijkii Xisbiga KULMIYE, iyo ballamihii aanu idiin qaadnay. Waxaan leeyahay, Taageerayaasha Xisbiga KULMIYE, sidii aad noogu listeen, ayaanu idiinku hambaynay.

Mudanayaal iyo Marwooyin,

Xilkii aad ii doorateen, waxaan ummadda Jamhuuriyadda Somaliland, aan ugu maamulay, si caddaalad, sinnaan iyo xaqsoor leh. Xaasha, Deegaan, deegaan kama xigsan, gobolna, gobol kale, kama jeclaysan, isla markaana, ma kala dhaweysan, intiinii ii codaysay, iyo intii iga codaysay. Waxaan dalka ku soo maamulay, muddadii aan qarankan, hoggaamiyaha ka ahaa, dulqaad, dad isku-wad, dan guud jacayl, dir-sooc la’aan, danaysi nacayb, iyo dareen Oday-nimo.

Mudanayaal iyo Marwooyin,

Dhawaan, waxa dalka ka dhici doonta, Doorashadii Madaxtooyada Jamhuuriyadda Somaliland, taas oo lagu dooran doono, Madaxweynihii i beddeli lahaa, isla markaana Qarankan, hoggaamin lahaa shanta sanno ee soo-socota. Madhaxa iyo Max-suulka doorashadani, waa mid saamayn weyn ku leh, nolosha iyo mustaqbalka Shacabka iyo Muwaadiniinta Somaliland.

Sidaa darteed, waxa waajib ku ah, ruux kasta oo leh xaq cod-bixineed, in uu u miidaan dayo codkiisa. Waxaan idiinku baaqaya, in aad doorashada ku gashaan nabadgelyo iyo deganaansho. Sidoo kale, waxaan idiinku baaqaya, in aad ix-tiraamtaan aragtiyaha iyo afkaaraha idinka soo horjeeda.  Anigu, waxaan ummadda u dooray, in hogaamiyihii i bedeli lahaa, uu noqdo Musharaxa Madaxweynaha ee Xisbiga Kulmiye, Muuse Biixi Cabdi, kaas oo ah siyaasi waayo-arag ah, oo ay ku duugan tahay karti, hufnaan iyo aqoon badani.

Soomaalidu, waxay ku maahmaahdaa, Hebel, jid mala martay, jabad mala degtay, jidiin mala cuntay.  Haddaba, waxaan leeyahay, Muuse ciyaar iyo caadifad, midna kuma dooran, ee aqoon dheer baan u leeyahay, kow iyo soddonkii sannadood, ee noloshayda u dambeeyey, wuxuu ka mid ahaa raggii garabka iyo gaashaanka ii ahaa, ee igu gedaannaa. Muuse, waxaan la maray jid-dheer, oo waxaan la degay jabad,  oo xitaa ardaagii Geel-jirahana, wada seexannay. Sidoo kale, jidiinna wada cunnay, oo iska daa wax kale’e, jabad cidla ah, labadayada oo qudhi, annaga oo qatan afar caano-maal, hilib Sakaaro ku dubannay.

Sidaa darteed, waxaan ugu baaqayaa dhammaan Taageerayaasha Xisbiga Kulmiye, in ay si buuxda isu bar-bar taagaan, isla markaana u codeeyaan Musharaxa Madaxweynaha iyo Madaxweyne Ku-xigeenka Xisbiga KULMIYE. Waxaan aamin-sanahay, in Mudane, Muuse Biixi Cabdi uu yahay, hoggaamiyaha ugu habboon, ee halkaa ka sii wadi kara hiigsigii aan lahaa, iyo horumarka uu dalku u baahan-yahay mustaqbalka dhaw iyo ka dheer.

Gallad Eebee Leh, Guulna Somaliland baa Leh,

Guulaysta,       Guulaysta,         Guulaysta,

 

Wararka

KULMIYE oo Maalinta Koowaad ee Ololihiisa Doorashada Ku Daah-furay Mawjado Isu Soo Baxyo ah

Hargeysa(Warbaahinta Xisbiga KULMIYE)-Xisbiga Midnimada iyo horumarka ee KULMIYE, ayaa maanta si rasmi ah u daah-furay ololihiisa doorashooyinka madaxtooyada shalay dalka oo dhan ka bilaabmay, waxana caasimadda Hargeysa ku ibo furay kumanaan kamid ah taageerayaasha xisbiga oo ay wehelinayaan hoggaanka sare ee xisbiga iyo guddida ololaha gobolka Maroodi-jeex.

Kumanaan kamid ah taageerayaasha xisbiga KULMIYE oo isugu jira, waayeel, dhallinyaro iyo haween, ayaa isagu soo baxay barxadda khayrida Hargeysa, waxan kala qaybgalay guddoomiyaha xisbiga KULMIYE Md. Muuse Biixi Cabdi, xubno kale oo hoggaanka xisbiga kamid ah, wasiirro, xildhibaanno, siyaasiyiin iyo guddida ololaha KULMIYE ee gobolka Maroodijeex, waxana halkaas laga jeediyey hadallo lagu guubaabinayo taageerayaasha, isla markaana loogu mahadcelinayo isu soo baxooda iyo taageerada ay xisbiga KULMIYE u muujiyeen.

 


Taageerayaasha xisbiga KULMIYE ee gobolka Maroodi-jeex oo kusoo labistay astaanta uu xisbiga KULMIYE caanka ku yahay, isla markaana lulaya caleemo qoyan, wejiyadooda iyo shirkoodana kusoo xardhay calanka xisbiga KULMIYE, ayaa si waafi ah u muujiyey sida ay ula dhacsan yihiin taageerada KULMIYE iyo murrashaxiintiisa.

 

Khudbado kooban oo macno iyo miisaanleh, ayaa loo jeediyey shacabka ku dhaqan caasimadda Hargeysa ee la dhacsan taageerada KULMIYE, waxana xubnihii halkaas ka hadlay oo ay kamid yihiin guddoomiyaha ololaha KULMIYE ee gobolka Maroodi-jeex Md. Axmed Cabdi Nuur Kijaandhe, Ambassador Xuseen Cali Ducaale (Cawil), Afhayeen Xasan Maxamed Gaafaadhi, Maayarka Caasimadda Hargeysa Md. Cabdiraxmaan Maxamuud Caydiid Soltelco, Yoonis Cali Nuur iyo guddoomiyaha xisbiga ee gobolka Maroodijeex Md. Maxamed Iid Dhimbiil, waxana ay taageerayaasha ku guubaabiyeen inay maalinta codka ku hubsadaan xisbiga KULMIYE.
Guddoomiyaha xisbiga KULMIYE, ahna murrashaxa madaxweyne ee xisbiga Md. Muuse Biixi Cabdi oo isaguna halkaas kala hadlay taageerayaasha KULMIYE, ayaa si mugleh ugaga mahadceliyey taageerada laxaadka leh ee ay muujiyeen, waxana uu sheegay inay shacabka reer Maroodi-jeex caan ku yihiin taageerada KULMIYE, kuna suntan yihiin guulihii uu KULMIYE kasoo hoyn jirey doorashooyinkii kala duwanaa ee dalka ka qabsoomay.

 

VideosWararka

Dowladda federaalka oo shir isugu yeedhay Madaxda maamul goboleedyada

Iyadoo markale uu shaac baxay isqabqabsi u dhaxeeyo madaxda maamul goboleedyada iyo dowladda Federaalka ee Soomaaliya, ayaa dadka falanqeeya arrimaha Soomaaliya waxa ay ka digayaan in arrintaasi ay dib u dhac ku keeni karto dalka.

Shalay ayey aheyd markii madaxda maamul goboleedyada Soomaaliya ay si wadajir ah u soo saareen war saxaafadeed ay ku dhaliileen dowladda federaalka.

Arrintan ayaa imanaysa todobaad un kaddib markii qarax weyn uu gilgilay magaalada Muqdisho, kaasi oo galaaftay nolosha 358 qof, boqolaal kalana ay ku dhaawacmeen.

Dhanka kale madaxweynaha Jamhuuriyadda Federaalka ee Soomaaliya Maxamed Cabdullaahi Maxamed Farmaajo ayaa martiqaad u diray Madaxda Dowlad Goboleedyada xubnaha ka ah Dowladda Federaalka Soomaaliya si ay uga soo qeybgalayaan shir wadatashi ah oo ka dhacaya magaalada Muqdisho 28ka Oktoobar, 2017.

War qoraal ah oo kasoo baxay dowladda federaalka ayaa lagu sheegay in shirkani looga arrinsan doonaa hawlo muhiim ah, ayna ugu horreyso sidii musiibadii qaran ee ka dhacday magaalada Muqdisho 14-kii bisha Oktoobar loogu beddali lahaa midnimo Qaran.

Dowladda federaalka ayaa sheegtay in waxyaabah shirkani diirada lagu saari doono ay kamid tahay sidii loo xoojin ahaa wadashaqeynta dowladda federaalka iyo dowlad goboleedyada iyo sidii dib u eegis loogu sameyn lahaa dastuurka.

War saxaafadeedka ayaa sidoo kale lagu sheegay in shirka looga wadahadli doona habka qeybsiga kheyraadka dalka iyo geeddi socodka doorashada ee sannadka 2020.

Image captionMadaxda maamul goboleedyada Soomaaliya

Maamul goboleedyada Soomaaliya ayaa horay u shaaciyay in ay samaysteen gole loogu magacdaray Golaha Dowlada Goboleedyada, kaa oo guddoomiye looga dhigay madaxweynaha Puntland Cabdiwali Maxamed Cali Gaas, halka ku xigeenkiisa loo doortay madaxweynaha Hirshabeelle Maxamed Cabdi Waare.

Maamulada kajira Soomaaliya ayaa shirkii Kismaayo waxaa ay cabasho iyo eedeymo ujeediyeen dowladda federaalka, waxaana eedeymahaasi kamid ahaa in aysan ka go’nayn hirgalinta nidaamka federaalka, qabashada doorasho qof iyo cod ah marka la gaaro sanadka 2020-ka iyo waliba in dowlad goboleedyada laga qadiyay deeqihii caalamka.

VideosWararka

Dhismaha Jidka Hormarra Cusbitaalka Adna oo Hakad Ku Yimid Iyo Dawladda Hoose oo aan Wax Tafaasiil ah Ka Bixinin

Hargaysa(Waaheen):-Maamulka dawladda hoose ee Caasimadda Hargaysa, ayaa Arbacaddii toddobaadkii aynu soo dhaafnay bilaabay Jidka dheer ee isku xidha Isgoyska loo yaqaan Total ilaa Jaamacadda Hargaysa.

Jidkan oo muddo dheer burbursanaa ayaa bilowga dib u Casriyaynteedda waxa soo dhaweeyay Shacabka ku dhaqan Degmadda Axmed Dhagax ee Caasimadda Hargaysa,taasoo ay weliba kaga qayb-qaateen Qaadhaan ay dawladda hoose ee magaalada Hargaysa ku xidhay samaynteedda,isla markaanna Shacabka degmaddaas marar badan u soo bandhigay inay dhismaha Wadada ay gacan ka gaystaan, iyagoo Maamulka fullinta ee dawladda hoose ee Caasimadda Hargaysa ogsoon inay shacabku bixiyaan Cashuurta ku waajibtay si ay u hellaan adeegyadda aasaasiga ah ee ay u baahan yihiin.

Jidkan laamiga ah oo qayb ka mida Daamur cusub la saaray ayaa hakad ku yimid, kadib markii ay Shacabka Xaafadda Axmed dhagax ay ku war helleen iyaddoo Qalabkii iyo Shaqaalihii ku hawlannaa dib u casriyaynta jidkaas ay dawladda hoose ee Hargaysa dib u rartay, iyagoo aan wax tafaasiil ah ka bixin is bedelka ku yimid qorshihii ay ku bilaabeen markii hore. Sidoo kalenna, aan bulshadda Xaafaddaas la socod-siin baahidda deg-degga ah ee dib loogu raray qalabkii hawshan lagu fullinaayay, hase-yeeshee Ilo wareedyo kala duwan ayaa Warbaahinta u tibaaxay in Qalabka iyo Shaqaalihii hawshaas gacanta ku hayay-ba lagu celiyay Ammar ka soo baxay Maamulka fullinta ee dawladda hoose ee Caasimadda Hargaysa.

Xoghayaha fullinta dawladda hoose ee Caasimadda Hargaysa Cali Xasan Cawaale ayaa boggiisa uu ku leeyahay deggalka Face-book, waxa uu ku sheegay War-gelin ku saabsan hakadka ku yimid Jidka Laamiga ah, waxaannu farrintaas kooban ku sheegay in dib loo bilaabi doonno maalmaha soo socda waa sida uu qoraalkiisa ku sheegee.

Xoghayaha fullinta dawladda hoose ee Caasimadda Hargaysa Cali Xasan Cawaale ayaa qoraalkiisaa ku yidhi sidatan “Waxaan halkan ugu sheegayaa dadweynaha ku dhaqan degmadda Axmed dhagax inay sii socon doonto dhismaha Wadada Horumarta dhakhtarka Adna Aadan haddii Rabbi idmo, isla markaana dhismaheeda dib loo bilaabi doono maalmahan soo socda. wax is bedela oo ku yimid dhismihii wadadana ma jiraan. Waxaan leeyahay dadka dhismaha wadadan ka dayaya ama u isticmaalaya kaambayn Siyaasadeed. ka waantoba in aad horumarka deegaanka u isticmaashaan boronbagaandho siyaasadeed.” Ayuu ku yidhi qoraalkiisa Xoghaye Cali Xasan Cawaale.

Si kastaba ha ahaatee Jidkan dheer ee isku xidha Isgoyska total ilaa Jaamacadda Hargaysa ayaa markii la bilaabay Arbacaddii toddobaadkii aynu soo dhaafnay waxa ka muuqday buun-buunin fara badan, waxaanna isugu yimid Siyaasiyiin, Wasiirro, Madax-dhaqmeed, Maamulka dawladda hoose iyo dadweyne aad u tiro badan, taasoo u muuqatay inaanay meesha leekayn, maaddaama oo ay Horumarinta iyo hellida adeegyadda aasaasiga ahi ay yihiin Waajibaad saarran dawladda hoose ee Caasimadda Hargaysa.