Day Archives: October 18, 2017

VideosWararka

Madaxweyne Siilaanyo Qoraal Jawaab celi ah u diray Komishanka Doorashooyinka Qaranka

Hargeysa(Waaheen) Madaxweynaha Jamhuuriyadda Somaliland Axmed Maxamed Maxamuud Siilaanyo ayaa shalay Komishanka Doorashooyinka Qaranka u diray Qoraal Jawaab celin ah oo uu kaga hadlayey xubin ka tirsan Komishanka la dagaalanka HIV/AID’s, oo ay guddida Anshaxa Axsaabtu ku Eedaysay isagoo shaqaale Dawladeed ah in uu ka qayb qaatay Ololaha Xisbiga Kulmiye.

Madaxweyne Siilaanyo oo Qoraal uu komishanku hore ugu soo gudbiyey Xukuumadda iyo Hay’adda Shaqaalaha Dawladda Tafsiir ka bixinaya ayaa ku sheegay qoraalkiisa in Agaasimaha Fulinta iyo Agaasimayaasha kale ee Komishanka Qaran ee Xakamaynta AIDS-ku ayna ka mid ahayn shaqaalaha joogtada ah ee lagu maamulayo sharciga shaqaalaha dawladda.

Madaxweyne Siilaanyo waxa kale oo uu sheegay shaqaalaha lagu dabiqi karo xeerka Anshaxa ee lagu xakamaynayo shaqaalaha Dawladdu inaanay ka qayb qaadan ololaha Axsaabta siyaasaddu inay yihiin shaqaalaha joogtada ah ee Dawladda.

Qoraalka Jawaab celinta ah ee uu u qoray Komishanka ayaa dabasocday qoraal hore ay Komishanku ku dalbadeen in la Anshax Mariyo C/kariin Xinif oo ah Agaasimaha maamulka iyo lacagta ee Komishanka AIDS-ka Somaliland.

VideosWararka

Rugta Ganacsiga iyo hay’adda SMEF oo Ganacsatada u qabtay Tababar kor loogu qaadayo Aqoonta ay u leeyihiin Dhoofinta Ganacsiyadooda.

Hargeysa(Waaheen) Rugta ganacsiga Somaliland oo kaashanaysa hay’adda SMEF ayaa maanta magaaladda Hargeysa uga furtay ganacsatada kala duwan ee Dabaqada dhexe iyo Hoose Tababar ku saabsan qaabka ay wax u Dhoofiyaan.

Tababarkan oo socon doona muddo shan cisho ah waxa ka sooq ayb galay ganacsato kala duwan oo ka kala socday goboladda Dalka, isla markaana isugu jiray kuwa wax soo saar iyo kuwa wax dhoofiya.

Madaxa hay’adda SMEF George Wagai oo ka hadlay furitaankii Tababarka ayaa ganacsatada Somaliland ku amaanay qaababka ay u maareeyaan Ganacsigooda, waxaanu sheegay dadka reer Somaliland inay yihiin kuwo ku tiirsan xirfadda ganacsiga.

George, waxa uu ganacsatada u sheegay inay maalin kasta isbedelo ku yimaadaan Nidaamka ganacsiga, sidaas daraadeed loo baahan yahay inay la jaan-qaadaan si aanay u khasaarin ama si ay u horumariyaan ganacsigooda.

Wasiirka wasaaradda Ganacsiga Somaliland Cumar Shuceyb Maxamed, oo furay Tababrka ayaa tilmaamay muhiimadda u tababarkani u leeyahay ganacsatada Somaliland, waxaanu ku booriyey inay ka faa’iidaystaan maadaama Ganacsigu laf-dhabar u yahay dhaqaalaha Somaliland.

Wasiir Cumar Shacayb, waxa uu Ganacsatada kula taliyey in la badiyo wax soo saarka si aynu dunida wax ugu dhoofin karno, isla markaana u heli karno lacago adag oo wax ka qabta Sicirka sarrifka, maadaama Somaliland ay tahay dal inta badan 95% wax la soo daga.

Guddoomiyey ku-xigeenka Rugta Ganacsiga Somaliland Jamaal Caydiid oo ka hadlay ayaa isna sheegay Rugta Ganacsigu inay la kaashatay tababarkan hay’adda SMEF, isla markaana ujeedada ugu weyni tahay sidii ay u horumarin lahaayeen aqoonta gaacsatada Somaliland u leedahay xidhiidhka dibeda, taasoo uu tilmaamay inay wax badan ka tari karto macaamilka ay Somaliland la leedahay ganacsatada kale ee dibeda.

X Aadan Baradho, oo ku hadlay Afka ganacsatada ka soo qayb gashay tababarkan ayaa soo dhaweeyey, waxaanu ku dheeraaday dhibaatadda ganacsatada Somaliland ka haysata wax dhoofinta, isagoo ka dayriyey in uu gaabaabsi yahay Xoolihii aynu ku tiirsanayn ee la dhoofin jiray.

X Aadan waxa uu ganacsatada Somaliland iyo bulshadaba ku dhaliilay wax soo saar la’aanta, isagoo is bar bar dhig ku sameeyey qaabkii ay dadka Somalida ahi barrigii hore wax ula soo bixi jireen ee aanay ugu tiirsanayn wax dibadeed iyo qaabka maanta noloshii ugu xidhnaatay dibed, isagoo sheegay haddaan laga tashan inay iman doonto maalin adag oo ay dunidu inaga xidhanto wax aynu cunnana wayno.

X Aadan waxa kale oo uu ka hadlay baahida loo qabo in la horumariyo Aqoonta ganacsiga oo uu sheegay in loo baahan yahay in tababaro noocan oo kale la badiyo, gaar ahaana kuwa xirfadda wax soo saarka si Ganacsatada Somaliland Suuq gayn uga hei karto Dunida.

VideosWararka

Warsaxaafadeed ay soo saareen odayaasha musdmbeedka jaaliyadaha reer Somaliland ee deggen, carriga ingiriiska kuna wajahan diginiin madaxdhaqameedka ka fogaaday milkaha iyo sharafta madaxdhaqameedka.

bismillahi arramanirraxeem.dhammaan ummadda reer somaliland iyo warbaahinta waxaan idin leenahay asalaamu calaykum wa raxma tullaah wa barakaatuh.allah ayaa mahad mudan,rasuulkiisa muxamed naxariis iyo nabadgelyo korkiisa ha ahaato.

Warsaxaafadeed ay soo saareen odayaasha musdmbeedka jaaliyadaha reer Somaliland ee deggen, carriga ingiriiska kuna wajahan digniin madaxdhaqameedka ka fogaaday milkaha iyo sharafta madaxdhaqameedka.

Ku: Madawaynaha jamhuriyadda  Somaliland mudane Axmed Maxamed Maxamud.

Og:labada gole Guurtida iyo golaha wakiillada.

Og:hay,daha nabadgelyada iyo ilaalinta dalka.

Og:Xisbiyada qaranka.

Og: bulshada reer Somaliland.

Annaga oo ku hadlayna magaca jaalliyadaha kor ku xusan waxaa fajac iyo u qaadan waa nagu noqotay madaxdhaqameedka dalka qaarkood oo ka leexday xilkii loo igmaday kaas oo ahaa in ay ka taliyaan nabadgelyada dalka iyaga oo qaarkood u leexday beelaha Somaliland in ay kala fogeeyaan ujeeddo ay ka leeyihiinna shacabka walaaha ah ee Somaliland aanay fahmin

Waxaanu ugu baaqayna cidda ay khusayso xubnaha u xusulduuban in ay kala fogeeyaan shackabka walaaha ah in lagu qaado waxa sharciga dalku ka qabo fidno abuurka oo aan la sii eegan inta aanay ummadda walaalaha ah dhibaato ka dhex abuurin.

 

Allah ayaa mahad oo dhan iska leh

Deeq Cabdi Digale

 

 

VideosWararka

Xuska Maalinta Shuhadada SNM Oo Laga qabtay Hargeysa  

Hargeisa (Waaheen) – Maalinta shuhadada SNM ee 17-ka October ayaa  shalay si  wayn looga xusay magaaladda Hargeisa ee caasimadda Somaliland, taas oo xaflad si wayn loo soo agaasimay ayaa waxay ka qabsoontay hoolka hay’adda shaqaalaha, isla markaana ay kasoo qaybgaleen mujaahidiinta aad u tiro badan, kuwaas oo muujiyey mihiimada ay leedahay maalinta loo asteeyey shuhadada SNM.

Munaasibadan oo aanay shalay kasoo xaadirin masuuliyiinta axsaabta qaranka ayaa waxa xaga xukuumadda kasoo qaybgashay wasiirka wasaaradda maaliyadda Marwo Samsam Cabdi Aadan, taas oo halkaasi ka jeedisay khudbad dhinacyo badan taabanaysay, iyadoo madaxda SOOYAAL halkaasi ku gudoonsiisay qadar lacag ah oo loogu talo-galay in loo qaybiyo mujaahidiintii kasoo qaybgashay xuska 17-ka October.

Wasiir Samsam ayaa waxay ku dheeraatay mihiimada ay maalintaasi u leedahay, waxaanay halkaasi uga ducaysay mujaahidiintii ku shihiiday halkaasi iyo kuwa nool. Waxa kale oo halkaasi ka hadashay Mujaahidad Yurub Abiib oo ka mid ah haweenkii sida wayn uga soo qaybqaatay halgankii dalka dib loogu xoreeyey, waxaaanay halkaasi uga mahadnaqday Madaxwayne Siilaanyo iyo Wasiirkiisa Maaliyadda Marwo Samsam Cabdi Aadan oo sheegtay inay hiil iyo hooba la barbar taagan tahay mujaahiinta SNM. Ugu horayn waxa halkaasi ka hadlay Guddoomiye ku xigaanka Jimciyadda Mujaahidiinta SNM ee SOOYAAL mujaahid Maxamuud Cabdi Xasan (Quule), kaas oo tafaasiil ka bixiyey duruufaha mujaahidiinta iyo xuska maalinta Shuhadada, waxaanu yidhi “Inkasta oo aanay inoo imanin madaxdii saddexda xisbi qaran, hadana waxaynu qabsanay munaasibadii ugu quruxda badnayd ee xuska maalinta shuhadada SNM, 17-ka October waa maalin ay gaar u leeyihiin Mujaahidiintu. Wakhtiyadii hore marka xuskan la qabanayo waxa aanu samayn jirnay garamaan iyo calamaan iyo waxyaabo la mid ah, maanta waxbaanu ka badalnay arrimihii oo nimankii mujaahidiinta ahaa awal garamada la siin jiray aanu siino woxogaa yar oo aanu kaga farxino nimankaa mujaahidiinta ah ee naafada ah. waxaanu arrintaasi uga mahadnaqaynaa marwo Samsam Cabdi Aadan wasiirka maaliyadda Somaliland oo runtii marwalba hiil iyo hooba nala barbar taagan, waanu u ducaynaynaa marwo Samsam Ilaahay ha ka Jazaa’i siiyo”.

Waxa kale oo iyaduna halkaasi ka hadashay  Mujaahid Yurub Abiib, taas oo ka warbixisay xuska maalinta shuhadada iyo waxyaabaha ku cusbaa munaasibadii shalay, waxaanay tidhi  “Xuska maalinta Shuhadada SNM ee 17 October  run ahaantii waxay i galisaa xasuus dheer iyo qiiro gaar ah, Ilaahay ha idinka jazaa’i siiyo juhdigii iyo halgankii dheeraa ee aad u soo gasheen dib u xoraynta dalka, intii dhimatay Alle ha u naxariisto intiina noolna nolol fiican baan idiin rajaynayaa, kolay ciil iyo cidhiidhi ma qabno kol hadaanu guumaysi ina haysanin oo aynu maanta xor nahay oo aynu calankeenii Tawxiidku ku qornaa aynu gacanta ku wada haysano guul baynu gaadhnay, mid kalena waxaan jeclahay inaan xuso oo barigii hore xusaskeena ciyaal iskuul baa la keeni jiray balse maanta arintu sidii way ka duwan tahay oo maanta in ka badan 200 mujaahid oo halgankaas kasoo qaybqaatay ayaa halkan iskugu timid, inkastoo sidii la doonayey aan looga soo qaybgalin munaasibadan  hadana inagu taariikhdan inagaa leh oo marwalba waynu xusi doonaa oo ka daali mayno oo hadii aynu labaatan noqono waynu sii yaryaraanaynaaye waynu xusaynaa oo maalintan inagaa leh ee aynu caruurteena barno taariikhda SNM si ay u fahmaan wixii dalkan loo soo maray, isla markaana nin walowba afar caruurtaada ka mid ah ama shan ka mid ah soo kaxayso, markaa waxaan ku dardaarmayaa aynu xuskeena sii kordhino bacdamaa aynu inagu leenahay maalintan 17-ka October”.

Marwo Yurub Abiib iyadoo hadalkeeda sii wadata, waxay intaasi raacisay “Waxaan aad iyo aad ugu mahad celinayaa Samsam Cabdi Aadan oo aanay taariikhda Somaliland ilaawi doonin oo ah gabadh baal-dahab ah kaga suntan iyadoo ay wasiiradda kale ku dhici waayeen inay kasoo qaybgalaan xuska maalinta shuhadada SNM ee 17 October, sidaad ogtihiin SNM-ta waa la wada sheegtaa oo qof aan waligii maalin halgankaa waxba ku darsanin ayaa marka mujaahidnimo lasoo hadalqaado ku odhanaya mujaahid baan ahay, waxaan leeyahay ninkii mujaahid ah halkan baa laga arki lahaa oo  uu joogi lahaa hadii uu mujaahid yahay. Samsam Cabdi Aadan waa mujaahidad ku suntan taariikhda SNM, anaguna haddii ay mar Samsam Cabdi Aadan joogto xuska 17-ka October anagu Wasiiradda waxba ugama baahnin, ka dumar ahaana 150-ka wasiir ee golaha wasiiradda Somaliland ku jira Samsam baa nooga qaalisan oo xuskayaga ayey kasoo qaybgashaa oo way iskaayo barbar taagtaa marwalba, waxaan u sheegayaa mujaahidiinta inay Samsam Cabdi Aadan tahay gacantooda midig, xukuumadda Madaxwayne Siilaanyo-na haddii aynu Samsam ka hayno cid aynu uga baahanahay ma jirto, ugu danbayn waxaan leeyahay Samsam taariikhda ayaa ku xusi doonta oo inan waxtar leh oo reer Hargeisa iyo reer Somaliland-ba waxtartay baad tahay Ilaahay ha kaa jazaa’i siiyo oo waanu kuu ducaynaynaa sidaad SNM-ta u saacido marlwalbana waanu kuu saacidi doonaa Insha Allaah, Madaxwayne Siilaanyo waxaanu leenahay waanu kaaga mahadnaqaynaa maadaama oo aad golahaaga wasiiradda Samsam noogu dartay qoladayada mujaahidiinta ah ”.

Ugu danbayn waxa munaasibadaasi soo xidhay oo halkaasi ka hadashay Wasiirka Wasaaradda Maaliyadda Marwo Samsam Cabdi Aadan, waxaana ka mid ahaa hadalkeedii “Ilaahay baa mahadaa iska leh in joojiyey inagoo dalkeenii xor yahay oo aan afarta la ina xaraynin oo wixii halkan ka dhici jiray aanay maanta ka dhacaynin oo wakhtiga aad doonto aad magaaladda mari karto oo waxa aad doonto aad dhisan karto Ilaahay mahadi ha ka gaadho, waxaynu u ducaynaynaa dadkii inoo soo halgamay ee inoo soo dagaalamay intii dhimatay Alle naxariistii jano ha ka waraabiyo inta noolna Ilaahay nolol wanaagsan oo cisi iyo sharaf leh ha siiyo”.

Wasiir Samsam iyadoo hadalkeeda sii wadata, waxay intaasi raacisay “Horta aniga Madaxwaynaha ayaa isoo diray oo Madaxwaynuhu maalinkasta oo munaasibad SNM ahi jirto wuu la socdaa, maanta waxa uu igu yidhi xoolo ha loo qalo oo maanta casuumad wayn ha loo sameeyo mujaahidiinta inta xasuusatay ee kasoo qaybgashay ee xasuusatay xuska maalinta shuhadada SNM, markaanu la tashanay mujaahidiinta waxay yidhaahdeen u qali mayno ee lacag ahaan ha lagu siiyo woxooga yar oo albaabada ayeynu xidhanaynaa inteena halkaa fadhida waxay inoo gaadho ayeynu u qaybsanaynaa”.

Wasiirka Maaliyadu mar ay ka hadlaysay suugaantii la tiriyey xiligii halgankii ay halgankaasi kaga qaybqaateen Abwaan Hadraawi iyo saaxiibkii Abwaan Gaariye (AHN) waxay tidhi “Ilaahay cimrigiisa ha dheereeyo oo caafimaad ha siiyee waxaan xasuustaa oo uu yidhi mar la odhan jiray dadka waa la madhinayaa oo waa la gumaadayaa ayaa gabaygiisii waxa ku jiray ‘Damal waarayaan ahay digdig beena kuma ruqo, cirka danab kasoo dhacay dalaw igama raarido, dibin-daabyo mooyee digo xaadhku ima tiro’ waynagaa joogna. Ilaahay ha u naxariistee Gaariye-na waxa uu yidhi ‘hadaan dhabban ahaa dheecaan macaanloo dhadhankiisa loo bogay maantaba dhuldiid lumay markay dhabi dhabkale timid dacar maw dhadhamayaa, ma dhacsade nin ii qabay ma dhuldhace ma qabay”.

 

 

VideosWararka

KULMIYE oo soo Dhaweeyey Garabka Sahanka Guusha Xisbiga oo ay ku Bahoobeen Siyaasiyiin WADDANI ahaa

Hargeysa (Waaheen)- Xisbul-xaakimka Somaliland ee KULMIYE, ayaa soo dhaweeyey Garabka Sahanka Guusha KULMIYE oo ay ku bahoobeen siyaasiyiin iyo aqoonyahanno miisaan leh oo ka soo digo-rogtay xisbiga mucaaradka ah ee WADDANI.

Xaflad si heersare ah loo agaasimay oo ka qabsoontay huteelka Maansoor ee magaalada Hargeysa maanta, kana qaybgaleen Guddoomiye-ku-xigeenka koowaad ee xisbiga KULMIYE Md. Maxamed Kaahin Axmed, Xildhibaanno ay ka mid yihiin Md. Siciid Cilmi Rooble iyo Ibraahim Jaamac Rayte, qaar ka mida safiirrada Somaliland u fadhiya waddamada dibada, siyaasiyiin, haween, garabka la soo dhaweynayey oo ka kooban xildhibaanno ka tirsan golayaasha degaannada Caynaba iyo Buuhoodle, Xoghayayaal, xubno garabyada kala duwan ee WADDANI madax uga ahaa meelo kala duwan iyo qaar ka tirsanaa golaha dhexe ee xisbigaasi iyo weliba saraakiil kale oo dhammaantood ka soo digo-rogtay xisbiga WADDANI iyo taageerayaashooda, waxaanna madasha laga jeediyey khudbado bogaadin iyo soo dhawayn u ah xooggaga cusub ee xisbiga ku soo biirtay, isla markaana lagu iftiimiyey inuu KULMIYE yahay xisbi aan la kala sheeganin, balse loo soo kala horreeyey.

Xubnaha Sahanka Guusha KULMIYE ee xisbiga WADDANI oo iyaguna hadallo halkaasi ka jeediyey, ayaa  ku dheeraaday siyaabihii ku kallifay inay ka baxaan xisbiga WADDANI, kuna biiraan KULMIYE, waxaanay sheegeen inay si wadajir ah u go’aansadeen inay codkooda iyo cuddudoodaba ku dhisaan xisbiga talada haya ee KULMIYE, kadib markii ay ka gun-gaadheen guuldarrada siyaasadeed ee xisbiga WADDANI.

“Annagu umaanu soo galin KULMIYE in aannu caddiyad iyo lacag ka xoogsanno, waxaannu u soo galnay markii aannu aragnay barmaamijkiisii hore ee uu waddanka wax ugu qabtay, markaannu akhrinay barmaamijkiisa cusub ee uu dalka ku dhammaystirayo waxqabadkiisa, markaannu aragnay mudnaanta iyo isku duubnaanta xisbiga KULMIYE, markaannu aragnay horumarka iyo hannaanka uu dalka u jeexay. Anigu waxaan ku ahaan jiray KULMIYE mucaarad oo weligay cod ma siin, laakiin maanta waxaan ku talogalay in aan codkayga siiyo KULMIYE oo weliba lacag ku doonimaayo ee aan anigu lacag ku bixiyo codkiisa, dhallinyarada waxaan leeyahay yaan yaan haadaan la idinka tuurin ee codkiina siiya KULMIYE.” Sidaa waxa yidhi Xildhibaan Abokor Shide oo ahaa xildhibaankii ugu codka badnaa xisbiga WADDANI ee uga soo baxay degmada Caynaba.

Xil. Ibraahim Jaamac Rayte oo dhawaan ka soo digo-rogtay xisbiga WADDANI, ayaa ku soo dhaweeyey masuuliyiinta iyo siyaasiyiintan cusub ee ku soo biiray xisbiga KULMIYE, isla markaana waxa uu tilmaamay in ay ku midaysanyihiin aragtida ay kaga yimaadeen xisbigaasi.

“Masuuliyiinta, xoghayayaasha iyo madaxda fara badan ee halkan maanta fadhiya oo ah laf-dhabartii xisbigii aannu ka wadatirsanayn ee WADDANI wax baanu wada arkaynay, wax baannu wada dhaliilsanayn, maanta waxaannu wada yaqiinsanay wixii aannu hore u wada dhaliilsanayn oo ah isbeddelkii iyo horumarkii aannu doonaynay in dalka laga sameeyo in aanay ka soo socon xisbiga WADDANI. Xisbiga keliya ee maanta rajadeennu ku jirtaa innagoo midaysan oo Somaliland ah waa KULMIYE,” ayuu yidhi Md. Rayte.

Sidoo kale, Xildhibaan Siciid Cilmi Rooble oo isna dhawaan ku soo biiray KULMIYE, horena halgamaashii WADDANI u ahaa, ayaa xusay in dhibaato wayni soo wajahday xisbiga WADDANI, waxaannu yidhi, “Nimankii aad ogaydeen ee ka yaacay xukuumadda ee wasiirrada iyo ra’iisal-wasaarayaasha ahaa ee aad garanaysaan ayaa WADDANI ka talinaya, WADDANI sidaas ayuu ku khalkhalayaa, raggii aasaasay xisbiga WADDANI talada wax gacanta ugu jiraa ma jiro, intii aasaasayaasha xisbigaasi ka ahayd dhammaantood waxaad arki doontaan iyagoo inoo yimaada, waxaynu leenahay nimankaa xukuumaddii Somaliland khalkhalin gaadhay Ilaahay ka badbaadiyo WADDANI waynu u ducaynaynaaye.”

Safiirka Somaliland ee dalka Fiinlaand Marwo Saamiya Muuse iyo xubno kale oo ka mid ah kuwa ku soo biiray xisbiga KULMIYE iyo saraakiil kale oo khudbado ka jeediyey xafladda, ayaa ka hadlay cududda iyo taageerada garabkan cusub ku soo kordhinayaan xisbiga KULMIYE oo ay ku tilmaameen mid taabbogal ah.

Ugu dambayn, Guddoomiye-ku-xigeenka koowaad ee xisbiga KULMIYE Md. Maxamed Kaahin Axmed, ayaa ku soo dhaweeyey KULMIYE masuuliyiinta iyo siyaasiyiinta ka soo baxay xisbiga WADDANI, waxaannu ku wargeliyey inay la xuquuq yihiin kuwii hore u sii joogay, isla markaana aanay marnaba qariibnimo ka dareemi doonin, waxana uu yidhi, “Dhaqanka xisbiga KULMIYE ayaa ah in dadka ka tirsani ay xuquuq siman wada leeyihiin, taladiisa iyo arrinkiisana meel bay uga soo wada jeedaan, idinkuna qariib kuma tihidine shidhkaad saaran tihiin.”

“Xisbi siyaasi ah oo marka uu hadlayo ka hadli karila’ inuu soo bandhigo aqoon, cilmi iyo barmaamij, innagu arrimo iyo barmaamij ayeynu ka hadlaynaa ee caytami mayno,” ayuu yidhi Md. Maxamed Kaahin.