Day Archives: October 17, 2017

MaqaalloVideos

Somaliland Waxay U Baahan Tahay Isbedel Siyaasadeed, Dhaqaale, Isbedelkuna Waxaa Uu Jiraa Xisbiga Wadani

Mar hore waxaan halkan ku cadaynayaa in aan aanay jirin wax shaqo ah am axil ah oo aan u hayo dowladda, gaar ahaana Wasaarada Duulista Hawada iyo Gaadiidka Cirka somaliland, maanta laga bilaamo waxaan door muhiim ah ka qaadanayaa arrimaha siyaasadda.

Sida aynu wada ognahay waxaa ina ku soo fool leh doorashadii , madaxtooyada somaliland oo ay in aka igto waqti kooban, waxaan rajaynayaa in ilaahay {SWT}, inoo ku suura geliyo qaab nabadgelyo iyo doorasho xor iyo xalaal ah.

Maanta dalkeena waxaa curyaamiyey sixir barar, musuq-maasuq, cadaalad darro iyo maamul xumo, waxaa soo dhibato ah maanta waxaa ina ka saari kara xisbiga badbaada somaliland ee Wadani.

Waxaynu ognahay in sidan ay maanta xaalku yahay in aan lagu sii socon Karin, ayna somaliland u baahan tahay isbedel dhaqaale, siyaasadeed, caafimaad iyo horuumar ka duwan kan maanta aynu ku jirno oo ah nidaam aan lagu sii jiri Karin.

Somaliland danteeda iyo ta mustaqbalkeena waxay ku jirtaa in maanta shacabka somaliland ay ka qayb qaataan isbedelka dalka ka socda ee uu hormoodka u yahay Xisbiga Wadani, uuna hoggaamiyaha ka yahya Dr. C/raxmaan Maxamed Cabdilaahi {Cirro}, oo ah shaqsiga keli ah ee maanta dalka iyo dadka isku wadi kara, kaasoo leh aqoontii hogaamineed, aqoontii waxbarasho, aqoontii waayo-aragnimo iyo aqoontii bulshada somaliland lagu dhiqi lahaa.

Sidoo kale xisbiga Wdaani waxaa hogaamiye ka ah Xirsi Cali X. Xasan oo shaqsi la wada ogyahay qiimaha uu leeyahay sida loo jecel yahay iyo saamaynta hoggaamineed uu qarankan ku dhex leeyahay iyo waxqabadkii uu caanka u ahaa markii uu xukuumadda ku jirey.

Ugu danbayntii waxaan u soo jeedinayaa dhallinyarada sharafta leh, haweenka, aqoon yahanka iyo dhamaan reer somaliland in ay ka qayb qaataan isbedelka uu wado xisbiga Wadani, kaasoo ah ka keli ah somaliland maanta ka saaraya dhibaatooyinka haysta.

Guul baan u rajaynayaa xisbiga Wadani, ana maanta laga bilaabo waxaab garab taagnahay xisbiga Wadani.

VideosWararka

Madaarka Hargeysa Oo Saaka Si Diiran Loogu Soo Dhaweeyey Masuulyiin Ka Tirsan Xisbiga Waddani Oo Dalka Dibadiisa Ka Yimid 

Hargeysa (Waaheen ):-Saraakiisha sar sare ee xisbiga mucaaridka ah ee Waddani ayaa waxaa ay saaka  madaarka diyaaradaha ee magaalada Hargeysa ay si diiran ugu soo dhaweyeen  masuulyiin ka tirsan xisbiga Waddani oo ka mid  dalalka qaarada Yurub .

Masuulyiintan ayaa waxaa ay kala yahiin  Jamac Saleeban Cabdi Macuun Xidhiidhiyaha bariga Africa ee xisbiga Waddani iyo Mustafe Haruun Cabdilaahi Gudoomiyaha xisbiga Waddani ee magaalada Brigham  , waxana  ay dalka u yimadeen sidii ay uga qeyb qaadan lahayeen olalaha xisbiga Waddani iyo doorashooyinka dhawaan dalka ka dhici doona

VideosWararka

Beesha Haashim Abokor oo Casuumad Taageero ah u Samaysay Murrashax Madaxweynaha KULMIYE

Hargeysa (Waaheen )- Mid ka mid ah beelaha dega Koonfurta caasimadda Hargeysa iyo Gobolka Hawd (Haashim Abokor/Arab), ayaa casuumad ballaadhan oo taageero ay ku siiyeen u sameeyey murrashaxa Madaxweynaha xisbiga KULMIYE Md. Muuse Biixi Cabdi.

Casuumadda oo ahayd si heer sare ah loo agaasimay oo ka dhacday beer ku taal deegaanka Uubaale ee deegaanka Masalaha ee Koonfurta magaalada Hargeysa, waxa ka qaybgalay madaxdhaqameedka iyo waxgaradka beesha Haashim Abokor, salaadiin kale, masuuliyiin iyo siyaasiyiin fara badan oo lagu casuumay iyo boqolaal qof oo beesha deegaanka ah, waxa sidoo kale goob-joog ka ahaa Guddoomiyaha, ahna murrashaxa jagada Madaxweynaha xisbiga KULMIYE Md. Muuse Biixi Cabdi oo halkaasi loogu muujiyey taageero baaxad leh.

Madasha casuumadda oo ahayd mid lagu xardhay calanka xisbul-xaakimka Somaliland ee KULMIYE iyo sawirka Murrashax Muuse Biixi, waxa hadallo ka jeediyey cuqaasha beesha martida loo ahaa oo dhammaantood isku raacay inay beel ahaan u midaysan yihiin taageerada xisbiga KULMIYE iyo murrashaxiisa Madaxweynaha Mudane, Muuse Biixi Cabdi oo carrabka ku adkeeyeen inuu isagu yahay murrashaxa ugu mudan ee u qalma madaxweyne hoggaamiya dalka Somaliland waqtigan, isla markaana beel ahaan uu jiro xidhiidh fara badan oo ka dhexeeya Muuse Biixi deegaan ahaan iyo taariikh ahaanba.

Masuuliyiin iyo madaxdhaqameed ay ka mid yihiin; Xildhibaan Axmed Cabdi (Kijaandhe) iyo Boqor Cismaan Aw Maxamuud (Buurmadow) oo khudbado ka jeediyey casuumaddaasi, ayaa ka mahadceliyey casuumadda ballaadhan iyo taageerada wayn ee beesha deegaanku u samaysay murrashaxa Madaxweynaha KULMIYE oo iyaguna ay u arkaan inuu yahay ninka ugu habboon in loo doorto madaxweynenimada qaranka.

Suldaanka guud ee beesha Haashim Abokor Suldaan Barre Xaaji Xuseen, ayaa isna si ballaadhan ugu mahadceliyey dadweynaha iyo marti sharafta ka qaybgashay casuumadda iyo sida ay u taageereen xisbiga KULMIYE.

Suldaan Barre waxa uu tilmaamay in taageerada isaga beeshiisu siinayaan murrashax Muuse Biixi ay tahay mid uu ka mudanyahay, waxaannu yidhi, “Muuse Biixi aniga iyo beeshaba abaal wayn oo aan la iloobi karin ayuu nagu leeyahay, maanta oo uu doonayo dad iyo madaxweyne hadalkiisaba daa ee inta uu nool yahay aniga iyo beeshuba wax la iloobi karo maaha.”

Ugu dambayntii, Guddoomiyaha, ahna Murrashaxa Madaxweynaha xisbiga KULMIYE Md. Muuse Biixi Cabdi oo hadal kooban ka jeediyey casuumaddaasi, ayaa erayo farxad iyo mahadcelin ah kaga dareen-celiyey martiqaadka iyo taageerada loo sameeyey.

“Waxaan aad iyo aad uga mahadnaqayaa xafladdan iyo casuumaddan karaamada iyo sharafta leh ee madashan quruxda badan leh ee abaabulka badan la galiyey, karaamadaa iyo taageeradaa aad noo muujiseen xisbi ahaan iyo murrashaxiin ahaanba aad iyo aad baanu idiinka mahadnaqaynaa ee Ilaahay ha idinka abaalmariyo,” ayuu yidhi Md. Muuse Biixi Cabdi.

 

VideosWararka

Madaxweynaha Oo Caawa Isugu yeedhay Murashixiinta Saddexda Xisbi Qaran, Xubnaha Komishanka Qaranka, Taliyeyaasha Ciidamada Qaranka iyo Gudoomiyeyaasha Guurtida Iyo Maxkamada Sare

Hargeysa(Waaheen)Madaxweynaha Jamhuuriyadda Somaliland, Mudane Axmed Maxamed Silaanyo waxa uu caawa kulan casho sharaf ah isugu yeedhay Komishanka qaranka, murashaxiinta saddexda xisbi qaran, gudoomiyaha guurtida, gudoomiyaha maxkamada, taliyeyaasha ciidamada, gudoomiyaha akaademiga nabada iyo horumarinta iyo xubno ka mida golaha wasiirada, waxaanu kulankaasi daaranaa hawlaha doorashada inagu soo foolka leh iyo sidii loogu hoggaansami lahaa shuruucda iyo qawaaniinta lagu hagayo doorashada dalka.

Waxaanu madaxweynuhu khudbadiisa ku yidhi”Bismillaahi Raxmaani Raxiim, Musharixiinta Saddexda Xisbi Qaran, Xubnaha Guddiga Doorashooyinka Qaranka, Shir-guddoonka Guurtida, Guddoomiyaha Maxkamadda Sare, Taliyayaasha Ciidammada kala duwan ee Qaranka, dhammaan waxaan idiin soo gudbinayaa salaan xambaarsan hilow, niyad-sami, nabad-gelyo iyo naxariis Eebe,”ASSALAMU CALAYKUM WA RAXMATULLAAHI WA BARAKAATU”.

Mudanayaal,

Sida aynu la wada soconno, muddo bil ka yar ayaa inaga xigta, qabsoomidda Doorashada Madaxtooyada Jamhuuriyadda Somaliland. Sharaf wey bay ii tahay, in aynu xallinay duruufihii ku xeernaa geedi-socodka dimuqraadiyadda, iyo doorashooyinka dalkeena.

Ugu horreyn, waxa waajib inagu ah, in aynu Allaheena weyn u mahad-naqno.

Mar labaad waxaan jecelahay, in aan madashan ka bogaadiyo hawl-wadeenadii, aan u igmaday xilalka kala duwan, ee gacanta iga siiyey hogaamiye ahaan, dhammaystirka in ay dalkan ka dhacdo doorasho xor iyo xalaal ah, taas oo ay daruurteedu ina dul joogto. Si gaar ah, waxaan u hambalyeynayaa Guddida Doorashooyinka, iyo Madaxda Xisbiyada Qaranka,  dedaalkii ay muujiyeen, iyo doorkii ay ka qaateen hawlaha doorashooyinka.

Mudanayaal,     

Doorashada aynu dhawaan u dareerayno idam Eebbe, waxay mustaqbalkeena ku leedahay saamayn weyn. Anigu Madaxweyne ahaan, markaan eego Baraaruga Bulshada, iyo Bisaylka Musharixiinta Baratamaysa, wax war-war ah ma qabo. Hase-yeeshee, waxaan jecelahay in aan dhammaan, halkan idiinka soo jeediyo, hadallo duco iyo dardaaran ah, taas oo ah, ujeedada aan idiin marti-qaaday caawa.

Mudanayaal,    

Doorashooyinku, ma aha wax inagu cusub, ee waxaynu u leenahay khibrad iyo waayo-aragnimo inagu filan. Sidaa darteed, waxa ummad ahaan, inala gudboon, in aynu xakamayno xamaasadda iyo xagtimaha loolanka dhexdeenu keeni karo

Waxaan leeyahay, doorashooyinka laguma kala baxo, ama laguma kala badiyo, xanaaq, xiisad la kiciyo, iyo hadallo xajiin iyo xanaf leh. Balse, Duco-qabayaal, Doorashada waxa lagu kala helaa taageerada bulshada, iyo sida loo kala kasbado caqliga cod-bixiyaasha. Haddaba, waxaan lixda musharax ee u tartamaya hoggaanka dalka, u jeedinayaa dardaarankan kooban.

1)     Mudanayaal,

Waa in aad dhawrtaan, Shuruucda iyo Xeerarka Nidaamka Doorashooyinka dalka. Sidoo kale, waxa waajib idinku ah, in aad u dhaga-nuglaataan, talooyinka, tilmaamaha iyo amarrada Guddida Doorashooyinka Qaranka, ee garsoorka idiin ah.

Duco-qabayaal, waxaan idin leeyahay “LAFAHA GURA, XARAGANA HAKA TAGINA”.

2)     Sidoo kale, waxa idinla gudboon, in aad taageerayaashiina ku wacyi-gelisaan, in ay ilaaliyaan anshaxa iyo nidaamka doorashada, isla markaana ay ka fogaadaan cunfiga, iyo wax kasta oo nabadgelyo darro abuuri kara.

3)     Waa in aynu dhinac uga soo wada jeesanno, cid kasta oo abuuraysa xasilooni darro iyo xiisad colaadeed. Waxa waajib ku ah muwaadiniinta Somaliland iyo musharixiinta hortayda fadhiya, in ay gacan siiyaan ciidammada qaranka ee ku hawlan, adkaynta nabadgelyada iyo sugidda amniga qaranka.

4)     Hore ayaa loo yidhi “GUULI LABA NIN KAMA WADA QOSLISO”. Sidaa darteed, Kursigan aan ku fadhiyo, ma qaado laba iyo saddex nin toona, ee dalkan waxa Madaxweyne ka noqonaya Nin qudha. Sidoo kale, waxa ku-xigeen ka noqonaya hal Nin.

Mudanayaal,

Waxaan hoggaanka dalka ku wareejin doonnaa, labada musharax ee doorashada sifo sharci ah ugu guulaysta, insha Allah. Sidaa darteed, saaxiibada loolamaya, waxaan leeyahay, marka ay soo baxdo natiijada doorashadu, waa in aad aqbashaan oo ogolaataan natiijada doorashada. Qarankani, wuxuu ku soo meel-maray, hab-dhaqan ku dhisan tudhaale, talo-wadaag, tawfiiq iyo isu-tanaasul.

Duco-qabayaal,

Ma aha, guuldarada siyaasaddu, in doorashada lagaaga adkaado, balse waxa guul darro iyo garaad xumo ah, in aad ku gacan-saydho go’aanka Guddida Doorashooyinka iyo Maxkamadda Sare.

Waad xasuusan tihiin, in aan kaga tegay Kursi Madaxweynenimo  bishii April, 2003-gii Siddeetan Cod, oo muran ku jiray. Waxaan u tudhay shacbigayga iyo sharaftayda, kuma khasaarin, ee taasi waxay ii goysay, in aan isla Kursigii ku helo boqolkiiba konton codadkii codbixiyaasha dalka.

Waxaan bogaadinayaa Mudane, Daahir Riyaale Kaahin, Madaxweynihii Hore, ee aqbalay natiijadii doorashadii Madaxtooyada ee qabsoontay 2010-kii, ee hogaanka dalka la iigu doortay, isla markaana xilkii qaranka iigu wareejiyey si sharaf iyo qadarin leh.

Sidoo kale, waxaan bogaadinayaa Guddoomiyaha Xisbiga UCID Mudane, Faysal Cali Wareebe, oo isna aqbalay natiijadii doorashada. Guddoomiye Faysal, waa waayo-arag, waxaanan ku amaanaya inuu aqbalay go’aamadii Guddida Doorashooyinka Qaranka ee natiijadii 2003-gii, 2005-kii iyo 2010-kii.

Mudanayaal,     

Guddida Doorashooyinka Qaranka, waxaan kula dardaarmayaa; DEDAAL, DUL-QAAD IYO DAACADNIMO.

WAXAAN UGA DIGAYAA GAR WEECSAN, IYO GUDDOON JILICSAN, OO AH GEERIDA GUDDI DHEX-DHEXAAD AH IYO HAY’ADAHA GARSOORKA.

Waxaan idiinku ducaynayaa, in ilaahay idin garab galo, xilkana idinku asturo.

Ugu dambayn, dhammaan ciidammada qaranka, waxaan ku bogaadinayaa, habeen iyo maalin heeganka ay ugu jiraan, difaaca iyo adkaynta Nabadgelyada dalkooda hooyo.

Taliyayaasha Ciidammada Qaranka, waxaan kula dardaarmayaa, in ay dedaalkooda laban laabaan xilligan, iyo in ay si buuxda ula shaqeeyaan Guddida Doorashooyinka Qaranka. Dhinaca kale, waxaan farayaa in ay gacan bir ah ku qabtaan, cid kasta oo isku dayda, in ay fawdo iyo fad-qalallo ka abuurto dalka. Ciidammada Qaranka, waxa ka reebban, in ay ku dhex milmaan ololaha doorashada, iyo Xisbiyada intaba.

Waxaan shacbiga Somaliland leeyahay, musharixiintu xaq idiin kuma laha, in ay idin dhex-dhigaan colaad iyo ciil-qab. Balse waxay xaq idiinku leeyihiin oo keliya, in ay idin weydiistaan caawimo iyo cod. Sidaa darteed, waxaan idiinku baaqayaa, in aad xil weyn iska saartaan, ilaalinta midnimada, wada-jirka, nabadgelyada iyo qaranimada dalka.

Guntii iyo gabe-gebadii, anigoo munaasibaddan ka faa’iidaysanaya, waxaan cambaareynayaa, falka argagixisada foosha xun, ee ka dhacay caasimadda dalka aynu deriska nahay ee Soomaaliya. Waxaan tacsi tiiraanyo leh u dirayaa, Qoysaskii iyo Qaraabadii, ay ka baxeen dadkii rayidka ahaa, ee halkaa ku geeriyooday.

Galad Eebaa Leh, Guulna Somaliland baa Leh

Allaheen Tubta Toosan ha inagu hanuuniyo,

Allaheen bash-bash iyo barwaaqo, baradeena haka yeelo,

Allaheen boggeena iyo beerkeena, burcad ha isu-mariyo,

 

VideosWararka

xisbiga Kulmiye oo xilal cusub u magacaabay Saaxil iyo Awdal

Hargeysa(Waaheen) Musharaxa Xisbiga Kulmiye Muuse Biixi Cabdi ayaa laba xil oo cusub u magacaabay labada Gobol ee Saaxil iyo Awdal ololaha Doorashada darteed.

Ku: Cabdikariim Maxamed Liibaan = Berbera =

Ku: Xuseen Cismaan Cilmi = Borama =

Og: Guddida Fulinta ee xisbiga KULMIYE = Hargiesa =

Ujeeddo: Magacaabista Xilal Cusub.

Kadib markii aan arkay muhiimadda buuxinta xilalkani u leeyihiin hawlaha abaabulka iyo ololaha xisbiga KULMIYE, waxa maanta oo ay bishu tahay 16 October, 2017 loo magacaabay xubnahan xilalka hoos ku qoran:

1. Cabdikariim Maxamed Liibaan – In maanta laga bilaabo uu ahaado Guddoomiye Ku Xigeenka Xisbiga KULMIYE ee Gobolka Saaxil.

2. Xuseen Cismaan Cilmi – In maanta laga bilaabo uu ahaado xubin ka tirsan Guddida Ololaha Xisbiga KULMIYE ee Gobolka Awdal.

Waxa aan u rajaynayaa masuuliyiinta magacyadoodu kor ku xusan yihiin in Alle ku asturo, kuna guuleeyo gudashada masuuliyadda ka dhalanaysa xilalkooda heer Gobol ee Xisbiga KULMIYE.

ALLAA MAHAD LEH

Muuse Biixi Cabdi

________________________________________