Day Archives: June 9, 2017

VideosWararka

Ganacsatada Somaliland oo cabasho ka muujisay cashuuro ay DP-world ku kordhisay Adeega Dekedda Berbera

Hargeysa(Waaheen) Urur ay ku bahoobeen ganacsatada Somaliland iyo shirkaddaha Hawlaha Maraakiibta ayaa Xukuumadda Somaliland u gudbiyey qoraal ay kaga cabanayaan kharashaad ay shirkadda DP-WORLD ku kordhisay adeegyadda ay fidiso, iyagoo sheegay in ay soo kordhiyeen culays ka badan kii hore ee laga qaadi jiray markii ay xukuumadda Somaliland maamulaysay.

dekeda-berberaCabashada ganacsatada ayaa la xidhiidha lacago farabadan oo la dul saaray dajinta iyo dhigida alaabaha ganacsatadu la soo dagto iyo waliba gaadiidka, kuwaas oo ay sheegeen DP-world inaanay wax adeeg ah oo intii ay dekeddu lahayd kusoo kordhin.

Ganacsatada ayaa qoraalkooda ku sheegay DP-world xataa inaanay tixgalin wada shaqaynta Ganacsatada iyo Ururkooda, sida qoraalka lagu sheegay, kaasoo iftiiminaya in ay iska indho tirayso muhiimadda ay wadashaqayntu u leedahay Amniga iyo koboca dhaqaale ee dekedda.

Ganacsatada ayaa ugu baaqay madaxweyne Axmed Siilaanyo in uu si dhakhso ah wax uga qabto talaabooyinka ay shirkadda DP-world ku maamulayso Dekedda Berbera oo ay sheegeen inay khatar ku noqon doonto sii shaqaynta Dekedda Berbera.

Bishii u danbaysay waxa isa soo tarayey cabashooyinkan soo shaac baxay ee ay ganacsatada Somaliland ku saluugsan tahay Maamulka Dekeda, halka dadweynaha Somaliland iyo dadka la socda Heshiiska DP-world iyo Somaliland ku dhaliilayaan in aan wali la samayn guddidii maamuli lahayd ee labada dhinac.

VideosWararka

Turkiga oo doonaya in uu la wareego Madaarka Caasimadda Somaliland ee Hargeysa

Hargeysa(Waaheen) wefti ka socday shirkadda Duulimaadyadda Turkiga ayaa dib usoo cusboonaysiisyey damacooda ah in ay la wareegaan maamulka Madaarka Hargeysa, kaasoo hore ay isugu af garan waayeen xukuumadda Somaliland.

madaarWeftiga Turkiga ah ayaa shalay la kulmay wasiirka wasaaradda Duulista iyo Hawada Somaliland, waxaanay wararka laga helayaa sheegayaan in ay is af-garad ka gaadheen, hase yeeshee madaxtooyadda Somaliland loo gudbin doono, taasoo xilligan u dhaw inay ansixiso.

Doonista madaarka hargeysa ee Turkiga ee wakhtigan ayaa u muuqda mid kusoo beegmaya khilaafka ka dhex aloosan dalalka Carabta oo u kala jabay laba garab oo waaweyn, kuwaas oo dhinac walbaaba u xusul duuban yahay in uu xulafo u helo mawqifkiisa.

Xukuumadda Somaliland ayaa hore madaarka Berbera uga kiraysay dawladda Imaaaraatka oo ah imika xulafada ka soo horjeeda Turkiga iyo Qadar, waxaana muuqda in ay Somaliland labada dhinacba macaamil la yeelan doonto labada xulafaba haddii Heshiiska Turkigu socdo.

Turkiga ayaa Qunsuliyad ku leh Somaliland, hase yeeshee taageerada uu u fidiyo Somaliland waa mid kooban, inkasta oo aan la kala saarin illaa hada dhinaca dabacu ku jiro ee aan suurtogalin iskaashi intan ka badan inay labada dal yeeshaan.

 

VideosWararka

Madaxweyne Siilaanyo oo magacaabay Wakaaladda Xabkaha iyo Faleenka

Hargeysa(Waaheen) Madaxweynaha Somaliland ayaa shalay digreeto ku soo saaray aasaaska wakaaladd ka shaqaysa Xabkaha iyo Faleenka.

WAR-SAXAAFADEED

Siilaanyo-777Madaxweynaha Jamhuuriyadda Somaliland, Mudane Axmed Maxamed Silaanyo, waxa uu xeer Madaxweyne oo summadeedu tahay JSL/M/XERM/249-4859/062017 uu ku aas-aasay dhismaha wakaaladda horumarinta xabkaha iyo faleenka ee Jamhuuriyadda Somaliland, kuna magacaabay Maareeye iyo Maareeye ku xigeenka Wakaaladda Xabkaha iyo Faleenka.

 

Madaxweynuhu:

 

Markuu Arkay:                     Qodobbada 90aad iyo 113aad ee Dastuurka Jamhuuriyadda Somaliland iyo Qodobka 63(3) ee Xeerka Kala Xadaynta Nidaamka Xukuumadda iyo Hay’adaha Madaxa Bannaan ee Xeer Lr. 71/2015;

Markuu Arkay:                     In khayraadka dabiiciga ah ee xabkaha iyo faleenka dalku kaalin mug leh ka qaadan karto horumarinta dhaqaalaha dalka;

 

Markuu Garwaaqsaday:  In ay waajib tahay in Xukuumaddu kaalin weyn ka qaadato daryeelka iyo horumarinta khayraadka xabkaha iyo faleenka, si looga badbaadiyo saamaynta ay ku keeni karto isbeddelada dabiiciga ah ee cimillada iyo abaaruhu;

 

Markuu Garwaaqsaday: In ay Xukuumaddu hormuud ka tahay dhiiri-gelinta iyo horumarinta iskaashatooyinka wax soo saarka iyo ka ganacsiga xabkaha iyo faleenka, si kor loogu qaado dhaqaalaha bulshada;

 

Markuu Xaqiiqsaday:        In loo baahan yahay in la abuuro fursadaha suuq-geynta xabkaha iyo faleenka, si kor loogu qaado ka ganacsiga khayraadka xabkaha iyo faleenka dalka;

 

Markuu Hubsaday:            In Qaranku u baahan-yahay hay’ad dawladeed oo si gaar ah ugu xil-saaran horumarinta iyo ka ganacsiga khayraadka xabkaha iyo faleenka dalka;

 

Markuu Si Xeel Dheer: Ula tashaday dadweynaha iyo laamaha dawladeed ee ay khuseyso;

 

Wuxuu Soo Saaray;

 

Xeerkan oo lagu aasaasayo Wakaaladda Horumarinta Xabkaha iyo Faleenka ee Jamhuuriyadda Somaliland.

 

Qodobka 1aad

Dhismaha Wakaaladda

 

1)     Waxa halkan lagu Aasaasay Wakaaladda Horumarinta Khayraadka Xabkaha iyo Faleenka oo yeelanaysa jiritaan qaanuuni ah, isla markaana u madax-bannaan hawleheeda shaqo iyo maaliyadeed, iyada oo u gudanaysa xilkeeda si waafaqsan dastuurka, xeerarka iyo siyaasadaha dalka.

 

2)     Wakaaladda Horumarinta Xabkaha iyo Faleenku waxay hoos tagi doontaa Wasaaradda Ganacsiga iyo Maalgashiga Caalamiga ah oo ku yeelan doonta awoodaha ay ka mid yihiin:

 

a)     Kormeerka iyo dabagalka sida: Helidda war-bixinnada shaqada, maaliyadda, iyo u gudbinta Xukuumadda Dhexe odoraska sannad-miisaaniyadeedka Wakaaladda, ka dib marka ay masuuliyiinta Wakaaladdu u soo gudbiso.

b)     Ka taakulaynta Wakaaladda diyaarinta qorshayaasha, siyaasadaha iyo kor u qaadidda xirfadaha iyo aqoonta hawl-wadeennada Wakaaladda.

 

Qodobka 2aad

Xilka iyo Waajibaadka Wakaaladda

 

Xilka iyo waajibaadka Wakaaladda Horumarinta Xabkaha iyo Faleenka waxa ka mid ah:

1)     Dhaqan-gelinta siyaasadaha iyo mashaariicda horumarineed ee Xukuumadda ee lagu horumarinayo khayraadka xabkaha iyo faleenka dalka.

 

 

2)     Dejinta qorshayaasha iyo halbeegyada shaqo ee Wakaaladda, si waafaqsan qorshaha iyo barnaamijyada guud ee Xukuumadda.

3)     Dejinta qorshayaal iyo cilmi-baadhis lagama maarmaan u ah horumarinta iyo ka faa’iidaysiga khayraadka dabiiciga ah ee xabkaha iyo faleenka dalka, iyada oo loo eegayo horumarinta xaga wax soo saarka, ka ganacsiga iyo suuq-gaynta.

4)     Ku dhiiri-gelinta beeralayda iyo iskaashatooyinka wax soo saarka iyo horumarinta xabkaha iyo faleenka oo ku dhisan nidaam casriyeysan.

5)     Dhismaha iyo abaabulka iskaashatooyinka ka ganacsiga khayraadka xabkaha iyo faleenka.

6)     Ka hawl-gelidda iyo abuuridda suuqyada ganacsiga xabkaha iyo faleenka ee dalka gudihiisa iyo dibeddiisaba.

7)     Diyaarinta iyo u soo bandhigidda Xukuumadda qorshayaasha horumarinta ganacsiga xabkaha iyo faleenka dalka.

8)     Diyaarinta iyo fulinta tallaabo kasta oo kale oo looga gol-leeyahay xaqiijinta ka faa’iidaysiga xabkaha, si loo hir-geliyo loona gaadho hiigsiga Xukuumadda ee koboca dhaqaalaha dalka.

9)     Fulinta hawlaha kale ee Xeerka Dhismaha Wakaaladda iyo Xeerarka kale ee khuseeya ee awoodda siinaya Wakaaladda.

 

Qodobka 3aad

Maamulka iyo Qaab-dhismeedka

 

1)     Wakaaladdu waxay yeelanaysaa Maareeye iyo Maareeye Ku-xigeen uu magacaabo Madaxweynuhu, ka dib marka uu la tashado Wasiirka Wasaaradda Ganacsiga iyo Maalgashiga Caalamiga ah.

2)     Qaab-dhismeedka iyo Awoodaha Wakaaladda, Xilka iyo Waajibaadka Maareeyaha, Maareeye Ku-xigeenka Wakaaladda iyo waxyaabaha kale ee lagama maarmaanka u ah, waxa lagu faah-faahin doonaa Xeerka Dhismaha Wakaaladda, si waafaqsan Qodobka 122aad ee Dastuurka iyo Qodobbada 64aad illaa 68aad ee Xeerka Kala Xadaynta Nidaamka Xukuumadda iyo Hay’adaha Madaxa Bannaan ee Xeer Lr. 71/2015.

 

 

Magacaabida Maareeyaha iyo Maareeye ku xigeenka

Ø Madaxweynuhu:

Markuu Arkay:                     Qodobka 90aad, Faqradiisa 3aad, Xarafka (kh) ee Dastuurka Jamhuuriyadda Somaliland;

 

Markuu Tixgeliyey:            Ahmiyadda ay Wakaaladda Xabkaha iyo Faleenku ee Jamhuuriyadda Somaliland u leedahay dhismaha iyo horumarinta Qaranka;

 

Markuu Arkay:                     In baahi loo qabo magacaabidda jagada Maareeyaha iyo Maareeye ku xigeenka Wakaaladda Xabkaha iyo Faleenka ee Jamhuuriyadda Somaliland;

 

Markuu Ka Fiirsaday:        Kartidooda, aqoontooda iyo hufnaantooda shaqo;

 

Markuu ku Qancay:           In ay hanan karaan xilalkan loo magacaabay;

 

Wuxuu go’aansaday

 

In Mudane, Cabdillaahi Maxamed Jaamac (Caray), laga bilaabo taariikhda maanta uu ahaado Maareeyaha Wakaaladda Xabkaha iyo Faleenka ee Jamhuuriyadda Somaliland.

 

In Mudane, Axmed Maxamed Xasan (Baradho), laga bilaabo taariikhda maanta uu ahaado Maareeye Ku-xigeenka Wakaaladda Xabkaha iyo Faleenka ee Jamhuuriyadda Somaliland.

 

 

ALLAA MAHAD LEH

 

Naasir Yuusuf Daahir

Agaasimaha Saxaafadda Madaxtooyada JSL, ahna

Ku simaha Af-hayeenka.

 

VideosWararka

Wasiirka Gaadiidka Cirka Iyo Dhulka Soomaaliya oo Hungo Kala Soo Noqday Safar uu ku Tagay Xafiiska ICAO ee Nairobi iyo Xarunta Guud (ICAO Headquarters, Montreal, Canada)

Hargeysa(Waaheen) Wasiirka Gaadiidka Cirka Iyo Dhulka Dawlada Soomaaliya Maxamed C/laahi Salaad, ayaa safar dhawaan ku tegay Xafiiska, ICAO Fiss Nairobi waxana uu halkaasi shir kula yeeshay gabadha la yidhaado  Ms Valentina isaga oo Wasiirku u sheegay in uu  doonayo in hawada Soomaliya lagu soo wareejiyo, balse gabadhan ayaa waxa ay ku wargalisay in uu tago Xarunta ICAO ee Montreal, Canada.

icoaWasiir Maxamed C/laahi Salaad waxa uu tagay Xarunta guud ee ICAO, (ICAO Headquarters, Montreal, Canada), waxaana uu halkaasi kula kulmay xoghaynta Guud ee ICAO Dr, Fang liu iyo Madaxa Farsamada ee ICAO Montreal Mr. Ivan Galan, waxana uu u soo jeediyey qorshihiisii ahaa in Hawada Soomaliya lagu soo wareejiyo, bal waxa ay ku war galiyeen in qorshaha ICAO yahay in ilaa 2018 la qalabeeyo Madaarada Soomaliya iyo Somaliland, sida Muqdisho, Hargaysa, Boosaaso iyo Kismaanyo, wixii intaa ka danbeeyana ay ICAO awood u leedahay in ay sii maamusho Hawada Somaliya, ilaa inta laga heshiinaayo.

Dhanka kale waxa Shir Hawada Soamliya laga hadlaayo  lagu  marti qaaday Wasiirka Duulista Somaliland oo ka dhacaaya  Nairobi Kenya, balse Wasiirka Duulista Somaliland oo hada Safar Jabuuti ah ka soo laabtay ayaa u igmaday Wasiir Kuxigeenkiisa Guuleed Maxamed Shire oo hada isagu ku maqan.

Waxaa wakhtigan iska cad odhaadii Wasiirka duulista Somaliland ee ahayad, “Warqad qoraal ah ayaan ka helay Xarunta ICAO ee Montreal oo waxa ay nagu war galiyeen in aanay dhacay in ay dhinac ku wareejiyaan hawada, oo kama shaki qabo.”