Maahmaahyo Saddexlay Ah

0
1544

 

W/Q: Cali Cabdi Coomay

 

 

Saddex ilaahay baa laga magan gala

  • Calool goono taqaan
  • Carrab naado yaqaan
  • Indho cawri yaqaan

Saddex baa Rag u liita

  • Tolkii cay
  • Taagtii kibir
  • Tarantii la colow

Affa dumar waa saddex

  • Kuu toosa
  • Kula toosa
  • Kaadi la toosa

Saddex xoolaheeda ku qaba oo waan ku furayaa

  • Tiro la’aan
  • Tabid la’aan
  • Tantoomo gurigaa

Saddex gurigeedaa ku qaba oo waan ku furayaa

  • Kordhin la’aan
  • Kala bedel la’aan
  • Kash kaash la’aan

   Saddex nafteedaa ku qabta oo waan ku furayaa

  • Gallan-gelin geel ka habaas weyn
  • Jinacna ka biyo neceb
  • Baran-barana ka dufan jecel

Saddex way qalloocdaan

  • Gabadh gabadhi dhaadhiday
  • Guri dayrta laga guuray
  • Geed naago diirteen

Saddex waa lagu ba’ay

  • Ban aan faras lahayn
  • Bani’aadan aan boqor lahayn
  • Barqo aan caano lahayn

Saddex laguma galo

  • Gaajo guri og
  • Gardaro garrab og
  • Gabow geeri og

Saddex baa Ragga u sii daran

  • Taada ma-yeele
  • Tiisu kumo bixiso
  • Tuu keenana kuma deeqdo

Saddex ilaahay baa kugu naca

  • Salaad la’aan
  • Soon la’aan
  • Seko la’aan

Saddex dumarka laguma galo

  • Ma hoyato
  • Ma hadhsato
  • Ma hamido

Saddex saddex maaha

  • Hilib sooryo maaha
  • Doqoni sokeeye maah
  • Suugaani hadal maaha

Saddex oradka laguma gaadho

  • Cawl cago ka neefsaday
  • Senge subag idaad dhamay
  • Caymad geel oo cidla u baxay

Saddexeey saddex ka samir

  • Nin laba naagood lahaw nabad ka samir
  • Nin saddex naagood lahaw soor ka samir
  • Nin afar naagood lahaw sibi xalaala ka samir

Saddex lama arag

  • Mari qof ka yar
  • Muddo maalin ka yar
  • Salaad ragcad ka yar

Saddex col baa jira

  • Col cad (biyaha)
  • Col madow (dadka)
  • Col cas (dabka)

Saddex faa’iido male

  • Onkod xagaa
  • Irmaan dameeraad
  • Arrin colaadeed

Nin saddex buu nin u yahay

  • Nin naagtiisuu nin u yahay
  • Ninna maalkiisuu nin u yahay
  • Ninna afkiisuu u nin yahay

      Saddex waa lagu tarmaa

  • Hoo waalid
  • Hayn cibaado
  • Hagar la’aan tol

Saddex waa laga tagaa

  • Gob cadhootay
  • Gun kibirtay
  • Gole ceebeed

 

Cali cabdi coomay

Suxufi, Qoraa ah.

Haragaysa, Soomaalilaan

calicoomay@hotmail.com

Tix-Raac: